Актуелниот шампион, МЗТ Скопје Аеродром ја оствари седмата победа во низа, по триумфот во еден од најинтересните натпревари оваа сезона во македонското кошаркарско првенство.
МЗТ СКОПЈЕ АЕРОДРОМ - ГОСТИВАР 78:75
МЗТ Скопје славеше со 78-75 и го преживеа фантастичното издание на противничкиот играч Ијасу Ворку кој стана прв играч сезонава со трипл-дабл во Првата лига. Плејмејкерот на Гостивар ги одигра сите 40 минути и постигна 23 поени, 11 скока и 11 асистенции, но тоа за малку не беше доволно за неговиот тим да ги освои бодовите во големото дерби.
Домаќините ја имаа контролата над играта и резултатот во најголемиот дел од мечот, но не успеаја порано да го решат прашањето околу победникот. Во втората четвртина водеа со 31-17 што беше највисока предност на една од екипите на овој натпревар. Гостиварци вратија со серија од 19-4 за водство од 36-35 на минута пред крајот на полувремето за во последниот напад МЗТ да се избори за минимална предност по 20 минути игра.
Слично беше и во вториот дел. МЗТ водеше со 46-38 и 48-40 за Гостивар преку Ворку и Силаџи да дојде до 50-50. На шест минути пред крајот на натпреварот беше 64-55 за аеродромци и повторно со серија од 9-0, тимот на Александар Јончевски дојде до израмнување. Во продолжение Вер постигна две тројки, а Крстевски погоди две положување за 74-69 на 67 секунди пред крајот, но тука бепе Ворку кој со девет поени по ред го одржуваше во живот својот тим.
Драмата достигна улминација во последните 20 секунди. Мекиќ и Стојановски промашија три слободни фрлања, а Дамјан погоди еднаш за 76-73. На спротивната страна со еден „пенал“ врати Јанески, но одбиената топка ја прифати Тодоровиќ кој имаше шанса на Гостивар да му донесе израмнување и продолжение. Сепак, Србинот беше прецизен само еднаш и МЗТ преку Стојановски стави точка на мечот.
Крстевски и Вер со по 19 поени беа најдобри поединци кај МЗТ Скопје. Во тимот на Гостивар, освен Ворку, се истакна и Силаџи со 18 поени
