Александар Тодоров пред почетокот на квалификациите: „Нè чека најтешкиот дел, верувам дека можеме да дојдеме до посакуваната цел“! (ВИДЕО) - КФСМ
10.02.2021

Пред третиот и последен дел од квалификациите, нè чекаат четири натпревари на турнирот во Перм

Александар Тодоров пред почетокот на квалификациите: „Нè чека најтешкиот дел, верувам дека можеме да дојдеме до посакуваната цел“! (ВИДЕО)

Селекторот на нашата машка сениорска репрезентација, Александар Тодоров пред стартот на февруарскиот ФИБА “прозорец“ и завршниот турнир од квалификациите за Евробаскетот 2022 ги сподели своите очекувања за она што нашиот национален тим го чека во Перм. Четири квалификациски натпревари во пет дена во кои ќе падне одлуката кои три селекции од групата „Б“ ќе бидат учесници на Евробаскетот.

На распоред е третиот и последен дел од квалификациите, и најтешкиот, ако се земе в предвид дека нè чекаат четири натпревари на турнирот во Перм?

„Дефинитивно најтежок, бидејќи четири натпревари во пет дена се навистина огромен напор за било кој спортист, не само за еден кошаркар. Но тоа е што е, ФИБА така проценила, наше е да се подготвиме и да направиме не само тактика, туку и стратегија како да настапиме на овие четири средби во Перм“.

Како за така кратко време да се подготви тимот за напорите кои ги носи турнирскиот систем на натпревари?

„Специјална физичка подготовка на тимот во период од седум дена колку што имаме до првиот натпревар, од кои само последните два тренинзи ќе сме комплетни, е невозможна. Она на кое можеме ние, како стручен штаб да влијаеме, е процесот на ‘рекуперација’, каде имам огромна доверба во знаењата на нашиот медицински штаб и на кондициониот тренер Ерен Ханѓун. Како и она што го истакнав, да подготвиме соодветна стратегија како да настапиме на овие средби“.

Имаме мали помени и во оној ростер од кој треба да се најдат патниците за Перм?

„Го имаме речиси идентичниот состав од Талин, со тоа што ги додадовме и оние играчи кои поради позитивни Ковид-тестови не беа во можност да отпатуваат за Естонија, како и Теодор Симиќ. Овојпат ќе отпатуваме со 15 кошаркари, како би можеле да ротираме на одредени средби. Нормално доколку се наложи или доколку прецениме дека е потребен одмор за одредени играчи“.

Можеме ли да стигнеме до целта, една победа против Естонија, двоцифрена по можност, и уште една против европските великани какви што несомнено се Русија и Италија?

„Прво се надевам дека ќе ги поминеме и следните два теста за Ковид-19, оној во сабота во Скопје и вториот во Перм во понеделник вечер. Доколку немаме поголеми проблеми, се разбира дека сметам дека можеме да дојдеме до посакуваната цел, без разлика што најважниот натпревар со Естонија го играме последен“.