09.12.2020

Серијата од (13-0) која ја направија играчите од Тиват во последните четири минути, беше кобна за кумановци, (78:83).

БИБЛ ЛИГА: Со силен финиш, Теодо направи пресврт и го победи Куманово!

Кошаркарите на Куманово го одиграа третиот натпревар во Лигата на Балканот. По двата одиграни мечеви со вториот македонски претставник, екипата на ТФТ, „сино-белите“ за прв пат во оваа сезона ги одмерија силите со екипата на Теодо од Тиват.

Засилени со Ненад Зивчевиќ, но не и Еди Синадиновиќ, кој кариерата наместо во Куманово ќе ја продолжи во Естонија, кумановци загубија од црногорскиот претставник, екипата на Теодо од Тиват.

КУМАНОВО – ТЕОДО    78:83

Откако во осум минути од играта, резулатот беше нерешен (17:17), гостите од Тиват направија серија од (7-2) со која поведоа (24:19), за првата четвртина да ја решат во своја корист со (26:23), благодарение на одличниот индивидуален ефект на Булатовиќ, кој веќе имаше 11.реализации.

Или една повеќе во однос на Андрејевиќ. Стартниот центар на Куманово имаше десет.

Тоа водство Црногорците упорно го чуваа, и на полувремето имаа слична позитива (45:41).

Дека овој меч ќе биде доста израмнет, покажа и третата четвртина во која ниту една од двете екипи не направи голема резултатска предност. Рос поентираше за нерешени (62:62) со кои се влезе во онаа четвртина на одлука.

Токму неговата серија продолжи и во решавачките минути. А по тројката на новакот Зивчевиќ, на 6:44 минути пред крајот, Куманово поведе со (70:64). Некоја минута подоцна, по слично „сценарио“, Куманово беше и на плус од 8 поени (77:69).  

Но гостинската екипа не се откажа, се врати со серија од шест поени, за и тоа како достижни (75:77), на две минути пред истекот на регуларните 40.

Во следниот напад, добро познатиот во македонската кошарка, Марко Мијовиќ, донесе и израмнување (77:77), па победникот се решаваше во 95. секунди.

Грешката на Рос со тројка ја казни Вујиновиќ за гостинската серија да биде (10-0). Со нова тројка, овојпат од Кусовац, за (83:77),  Куманово ги загуби сите шанси за успех.

Со 23.поени, Рос беше најефикасниот играч на Куманово, Андрејевиќ додаде 18 (плус и осум скока), а Зивчевиќ имаше 13. поени во својот премиерен настап за новиот клуб.

Согласно со распоредот во оваа регионална лига, следниот натпревар на Куманово е закажан за 18. декември, кога на гости им доаѓа екипата на Академик од Пловдив.