ЕП ДИВИЗИЈА Б „ПОД 16“ МАЖИ – СКОПЈЕ: Кадетите на Македонија пред својата публика во Скопје, ќе бараат шанса што подобар пласман

06.08.2025

„На сите нас треба да ни е јасно дека е гордост да се бранат боите на Македонија, и дека репрезентацијата е над сите“

По младинската, потоа и јуниорската, ова лето дојде редот и на кадетската репрезентација на Македонија да покаже каков потенцијал, квалитети енергија има за настап на едно Европско натпреварување.

Од 7. до 16. август, Македонија ќе биде домаќини на евро-шампионатот во кадетска конкуренција.

Селекторот на репрезентацијата „Под 16“ години, Нермин Пепиќ потенцира неколку битни моменти пред почетокот на Европското првенство од Дивизијата „Б“.

„Генерално сум задоволен од подготовките. Најбитно е дека екипата е комплетна, немаме повредени играчи и сите се спремни да го дадат својот максимум. Исто така ми е особено важно играчите да бидат максимално мотивирани, и да не ни недостасува желбата за победа бидејќи играме на домашен терен и пред нашата публика. На сите нас треба да ни е јасно дека е гордост да се бранат боите на Македонија, и дека репрезентацијата е над сите. Само така, заедно сплотени можеме да обезбедиме што е можно подобар пласман“ – вели селекторот на нашата кадетска репрезентација.

Пепиќ вели дека знаат доста работи за ривалите во групата, но оние дополнителните ќе следуваат во текот на шампионатот, кој ќе се игра во двете сали на Спортскиот центар „Јане Сандански“ во Скопје.

„Имаме информации за противниците. И иако тоа не се некои звучни репрезентации, можам да кажам дека сите располагаат со некаков квалитет и секој натпревар очекуваме да биде неизвесен“- дополнува Пепиќ пред стартот на првенството кое е во организација на нашата федерација.

СИСТЕМ ЗА НАТПРЕВАРУВАЊЕ

Без некои промени, би се рекло стандарден, кога станува збор за овие натпреварувања.

Селекциите се поделени во четири групи (две со пет, и две со шест) од кои првопласираните две од секоја група ќе обезбедат пласман во ТОП 8 фазата, односно онаа преку која ќе се бараат идните учесници на ЕП од Дивизијата „А“ во оваа возрасна категорија.

Во вториот дел кој почнува на 14.август, ќе се играат елиминациски натпревари според системот (А1-Б2, Д1-Ц2, Б1-А2, Ц1-Д2). Четирите победници во четвртфиналето, обезбедуваат пласман во полуфиналето, поразените ќе разигруваат за пласман од 5. до 8. место.

Националните тимови кои првата фаза ќе ја завршат на третото односно на четврттото место ќе играат за пласман од 9. до 16. место, додека пак оние кои ќе бидат петто односно шестто пласирани ќе разигруваат за позициите од 17 до 22.

РАСПОРЕД НА НАТПРЕВАРИТЕ НА МАКЕДОНИЈА

Нашата машка кадетска репрезентација ќе го почне натпреварувањето на овој евро-шампионат на 7. август (четврток), од 18.30 часот, кога во спортскиот центар „Јане Сандански“ во Скопје, следува натпреварот против селекцијата на Кипар.

Наредниот ден, на 8. август, во истиот термин, Македонија ќе игра против селекцијата на Ирска. Во „нашиот“ термин, на 9.август, за противник ја имаме репрезентацијата на Полска.

По еден ден одмор, на 11.август, нашите кадети ќе ги одмерат силите со селекцијата на Босна и Херцеговина, во натпреварот кој е закажан исто така од 18.30 часот, а оваа прва фаза од првенството во Скопје ќе ја затвориме на 12.август, кога Македонија игра против репрезентацијата на Словачка.