Кошаркарската федерација на Северна Македонија се приклучи на новиот европски проект Еразмус + со цел да го промовира образованието во и преку спортот.
Координатор на проектот е Кипарската кошаркарска федерација, а партнери, освен нашата, се и федерацијата на Романија, како и Центарот за социјални иновации (Кипар), МСВ Баскет (Италија) и Солунскиот американски колеџ од Анадолија.
Со овој европски проект, нашата федерација сака да го поддржи развојот на животните вештини кај спортистите во синхронизација со имплементацијата и примената на упатствата на Европската унија за „Двојни кариери на спортисти“.
Проектот е наречен Basketball for Life Skills (BASKI) и има за цел да развие програма за обука на тренери во кошарка, наставници по физичко образование и лидери во спортот и образованието за промовирање на практиката на кошарка кај учениците од основно училиште како средина за развој на животни вештини, со акцент на граѓанското учество и социјалниот придонес.
Меѓу очекуваните резултати од иницијативата се и охрабрувањето на младите луѓе да спортуваат и со тоа да се стекнат со основни животни вештини како одговорност, лидерство, тимска работа, емпатија, донесување одлуки, планирање, креативност, вештини за комуникација и друго.
Спортот, а особено кошарката, е важен фактор во развојот на самодовербата на адолесцентите, идентитетот и компетентноста.
