По седми пат финалето на националниотѕ Куп, кој од оваа година го носи името на Благоја Георгиевски Буштур, ќе се одвива помеѓу вечните ривали.
А во вечерашниот дуел Работнички влегува како бранител на трофејот освоен во сезоната 2018/19 (лани не се одигра поради пандемијата со корона-вирусот).
Досега МЗТ и Работнички делеа по три победи кога во прашање се меѓусебните дуели во финалето, што значи дека по денешната средба ќе се знае кому ќе припадне директниот биланс.
1994 година Работнички – МЗТ Скопје 81:49
1996 година МЗТ Скопје – Работнички 69:64
2000 година МЗТ Скопје – Работнички 68:66
2003 година Работнички – МЗТ Скопје 70:68
2011 година Работнички – МЗТ Скопје 74:69
2018 година МЗТ Скопје – Работнички 76:67
Работнички како најтрофеен во Купот атакува на подобрување на рекордот кој засега стои на 10 титули, додека МЗТ има една титула помалку и има убава шанса во директна пресметка да се израмни со вечниот ривал.
Патот до големото финале
„Аеродромци“ лесно прелетаа до финалето. Остварија убедливи победи над Куманово 2009 (100:84) во четвртфиналето, а потоа и над Навико ФМП Академија (92:72) во полуфиналето. Работнички се помачи малку повеќе за да стигне до битка за трофејот. Прво против ТФТ Скопје триумфираше со (66:62), ден подоцна беше подобар од Еуро Никел 2005 со резултат (85:79).
