ТФТ помина една голема пречка на патото кон одбрана на пехарот кој го освои во ланското издание на Купот „Благоја Георгиевски-Буштур“. Вечерва беше подобар од Работнички, а утревечер го чека меч со МЗТ Скопје Аеродром.
„Уште пред стартот на Купот кажав дека очекувам 50-50 натпревар и дека некоја топка и моментална инспирација ќе решава. Навистина беше тешко, отворивме добро... Работнички се врати, а клуч за нас беше третата четвртина кога во дефанзивата покажавме агресивност и дојдовме до лесни транзициски поени, па ја задржавме таа позитива до самиот крај. Ова е прв меч од трите, лани сонувавме за чудо, немојте да мислите дека оваа година не го посакуваме пак. Се надевам дека ТФТ преку „вечните“ ќе закаже дуел против Пелистер“- најави Боро Смилковски по првата победа на турнирот во СРЦ „Кале“.
Виктор Ташовски погодуваше кога на ТФТ му беше потребно да го зададе решавачкиот удар:
„Добро го отворивме мечот, но потоа Работнички фати приклучок и цел меч бевме близу, а во второто полувреме го кренавме нивото и победивме. Не се плашиме од никого, го чекаме мечот со МЗТ Скопје, па подобриот нека победи“.
