Втор контролен натпревар за машката сениорска репрезентација на Македонија во оној средишен дел од подготовките за настап во претквалификациите за пласман на Светскиот Куп 2027.
Уште еднаш, во два дена, во улога на спаринг-партнер во спортскиот комплекс „НБ Ноел“ во Негорски бањи, на избраниците на селекторот Марјан Илиевски беше селекцијата на Швајцарија.
МАКЕДОНИЈА – ШВАЈЦАРИЈА 65:52
Нашата селекција го имаше почетното водство (9:5), кога Мекиќ погоди за три. Но кратко траеше, беше нашата предност во воведната четвртина. Ја доби Швајцарија со минимални (20:18).
Гостите имаа плус 7, (29:22), по нешто повеќе од три минути игра во втората четвртина. Во наредните три, се доближивме на негатива од три поени (35:38).
На крајот на првото полувреме, заостанувавме еден поен помалку (40:42), откако Стојановски ја погоди втората тимска тројка.
На почетокот на второто, стигнавме до егал скор, (42:42), а по положувањето на Вајли, Македонија поведе, со (44:42).
Тоа што не красеше на првата проверка, нашите кошаркари го презентираа во третиот дел, тргнаа уште поенергично, особено во фазата на одбраната, што резултираше со нашето прво осетно водство, (51:44), откако за три погоди Симиќ, а сето тоа некако го иницираше капитенот Магдевски.
Дефанзивата помогна да го задржиме тоа наше водство, и по 30.минути, Македонија водеше со (58:52).
Во ист стил продолживме и во последниот дел, кога енергијата на теренот ја пренесе Хот, кој ја отвори серијата од (7-0) по која дојдовме до највисоката предност, (65:52), по што на 6:38 минути следуваше прекин на мечот.
Разлика доволна за втора победа во контролните средби против Швајцарија, како добра најава за она што следува – настапите во претквалификацит за Светскиот Куп и дуелите со селекциите на Романија и Унгарија во месец август.
Репрезентацијата вечерва се враќа во Скопје, а по утрешниот слободен ден, во понеделник продолжуваат подготовките во СРЦ „Кале“. Во главниот град, македонските кошаркари ќе останат до среда, кога заминуваат за Куманово. Таму, во сабота, на 2. август ќе го играме првиот натпревар од претквалификациите, а противник ни е репрезентацијата на Романија.
