Ненад Димитријевиќ се врати во националниот сениорски тим на Македонија. Ги прескокна претквалификациските средби во ноемврискиот и февруарскиот FIBA „прозорец“ од претквалификациите за Евробаскетот 2025, оние против селекциите на Словачка, Норвешка и Данска. Но, уште на првите тренинзи ново-стариот играч на рускиот Уникс, освојувачот на ВТБ лигата, покажува дека максимално подготвен е да одговори на следните репрезентативни обврски.
Оние кои од 12. до 15. август ќе се играат во Талин, а се надеваме дека ќе ги продолжиме и од 16. до 20. август, во Гљивице.
Репрезентативниот бек е запознат со квалитетите на противниците на турнирот во Естонија, макар што во овој момент се непознати играчките ростери на домаќинот, но и на Чешка и Израел.
„Ги знаеме нивните квалитети, знаеме дека ќе играме против сериозни репрезентации. Со Естонија игравме во квалификациите за Европското првенство пред две години. Тоа е силна репрезентација, а ние се спремаме најдобро што можеме. Да пробаме да преминеме во следната рунда од натпреварите“.
Македонија во овој олимписки претквалификациски циклус, има ростер од искусни но и млади играчи. Може ли да го издржат притисокот на играње на турнирски систем, и дали двете „контроли“ со Полска во Белград овој викенд, се доволни за максимална подготовка?
„Натпреварите со Полска се предвидени токму за тоа, да се подготвиме за тоа што следува, за турнирот во Талин. И се надевам дека ќе бидеме подготвени за оној прв натпревар таму во Естонија“.
Може ли Македонија да стигне и до турнирот во Полска?
„Целта е да запишеме две победи и да одиме во Полска. За тоа и се подготвуваме. Но ќе одиме од натпревар до натпревар. Мислам дека така е најпаметно да гледаме на работите. Потоа ќе се сконцентрираме на она што следува“- смета нашиот организатор на играта.
