Судискиот оддел на ФИБА ги потврди номинациите на официјалните лица за последните два натпревари од вториот круг од претквалификациите за пласман на Евробаскетот 2025 година.
Односно натпреварите од групата „Д“ во која е и нашиот сениорски национален тим.
На натпреварот од петтото коло, Словачка-Македонија, кој се игра на 23. февруари во Левице (од 18.часот), правдата ќе ја дели судиската тројка: Венцислав Великов (Бугарија), Мехмет Сахин (Турција) и Март Ухендрик (Естонија). Во улога на делегат е Томаш Кудлицки (Полска).
На оној наредниот, и последниот меч од вториот пред-елиминациски циклус, закажан за 26. февруари (18.00), кој нашите најдобри кошакари ќе го одиграат во Осло, против репрезентацијата на Норвешка, како официјални лица-судии, ќе бидат: Циприан Стоика (Романија), Чан Мавису (Турција) и Хавиер Торес Санчез од Шпанија, а делегат е Иван Бодроговари од Унгарија.
