И 13 круг од Првата лига донесе неколку навистина одлични индивидуални остварувања, макар што во преден план излегуваат две. Она на Мајрон Гордон од Кожув, остварено на гостувањето во Струмица, и она на Бојан Трајковски, на гостински терен во Кисела Вода...
МАЈРОН ГОРДОН (КОЖУВ)
Уште еднаш покажа дека е предводник на екипата од Гевгелија, особено во оние офанзивни активности. Најдобриот стрелец во Првата лига беше во рамките на својот кошгетерски просек и на гостувањето во Струмица.
За нешто повеќе од 28.минути во игра, реализираше исто толкав број на поени – 28 (4/8 за три, 7/11 за два и 2/2 за еден поен), на кои додаде и осум скока, шест асистенции, но и шест освоени топки, доволно за индекс-39, највисок во овој 13. прволигашки круг.
БОЈАН ТРАЈКОВСКИ (ФЕНИКС 2010)
Можеби е највозрасен, но е веројатно и најдобриот играч на Феникс 2010, не само во овој прв дел од сезоната. Потврдата дојде и на средбата во која неговата екипа покажа сигурност, на крајот и победи.
А Трајковски имаше и најдобар поединечен ефект.
Одигра повеќе од 32.минути, и запиша исто толку поени, 32, со висока реализација (3/7 за три, 10/16 за два поени) и три слободни фрлања (од четири обиди). Беше на чекор до трипл-дабл затоа што на своето конто запиша и девет асистенции и осум скока, две освоени и пет загубени топки – индекс 37!
КЕНИ КАРПЕНТЕР (ПЕЛИСТЕР)
Најзаслужниот што екипата на Пелистер го „доби“ Работнички и тоа на гостински терен во СРЦ „Кале“. Беше доста ефикасен уште од почетокот на средбата во кој „пелистерци“ креираа висока предност. А секогаш беше подготвен да продолжи со поентирањето во моментите кога не му одеше на тимот, посебно во оние финални минути.
На крајот, застана на ефект од 30 поени (4/8 за три, 7/8 за два и 4/4 за еден поен), додаде и четири скока, едно додавање, и по две освоени односно загубени топки за 37 минути во игра, и индекс – 30!
КАМЕРОН ФОРТЕ (РАБОТНИЧКИ)
Неговиот ефект за жал, по Работнички, овојпат не беше доволен за победа. Продолжи со своите одлични индивидуални остварувања силното крило на „црвено-белите“ и во дуелот со Пелистер.
Имаше двоен ефект, изразен со реализација на 19 поени (9/13 за два и 1/1 за еден поен), 11 скока, плус и шест асистенции и три загубени топки за 27:24 минути на теренот, доволно за индекс 30.
ГИОРГИ КОРСАНТИА (ГОСТИВАР)
Еден од најзаслужните што лидерот во лигата, МЗТ Скопје Аеродром, „падна“ и по втор пат во мечевите против неговиот Гостивар. Високиот Грузиец имаше уште едно ол-раунд издание, изразено со 21 реализација (1/5 за три, 8/12 за два и 2/7 за еден поен), но и 13 скока, седум освоени топки, три загубени и три асистенции за 37:34 минути на теренот во салата „Младост“ и индекс-29.
ПРВА ПЕТОРКА
Мајрон Гордон (Кожув)
Бојан Трајковски (Феникс 2010)
Кени Карпентер (Пелистер)
Камерон Форте (Работнички)
Гиорги Корсантиа (Гостивар)
ВТОРА ПЕТОРКА
Дарел Френклин (Чаир 2030)
Андреј Митревски (Феникс 2010)
Маск Смит-Меквејн (Навико Академија ФМП)
Трент Батрик (ТФТ)
Елијах Џојнер (Куманово 2009)
*Петорките се формираат врз основа на бројот на индексни поени
