Крајот на оваа седмица ќе биде почеток на селектирањето на уште една наша машка репрезентација. Онаа „Под 14“ години, на играчи родени 2009 година, кои ќе имаат свои активности во текот на 2023 година, а ќе кулминираат со настап на традиционалниот меѓународен турнир „Словениа Бол“ во Словењ Градец.
„Во недела означуваме почеток на активностите на оваа наша национална селекција на играчи родени 2009 година. Испланирани се и првите тренинзи кои ќе бидат селективни. Ќе работиме во две групи, во раниот термин од 11 до 12.30 часот, ќе ги следиме играчите од 'скопскиот регион'. А од 12.30 до 14.часот, на тренинг ќе бидат и кошаркарите кои доаѓаат од другите делови на земјата“- појаснува селекторот Владимир Мирковски.
Тренинзите ќе се реализираат во салата на СУГС „Лазар Танев“ во Скопје, по што Мирковски ќе ги определи младите играли кои ќе продолжат со планираните активности
„Во договор со спортскиот директор, Марјан Србиноски, планираме да направиме и неделни тренинзи, а во почетокот на наредната година, од 9. до 16.јануари за време на зимскиот распуст и неколкудневни подготовки со овие момци. Во плановите ни се и учества на два турнири во текот на март и на мај, а кулминацијата ќе биде настапот на ‘Словениа Бол’ во август“- дополнува Мирковски.
