Машката репрезентација на Македонија за играчи „Под 18“ години загуби од Романија на првиот од двата контролни натпревари закажани на гостински терен во Крајова.
РОМАНИЈА (У18) – МАКЕДОНИЈА (У18) 87:73
Домашната селекција направи голема предност уште во првата четвртина (29:15), која успешно ја одржуваше во продолжението од натпреварот.
На полувреметото резултатот беше уште повисок во полза на противникот (47:25), слично беше и по три одиграни четвртини, Романија водеше со сигурни (65:45).
Нашите најдобри минути беа последните десет во кои успеавме да симнеме добар дел од акумулираната негатива уште во овој стартен интервал од „контролата“ во Крајова (73:87).
Селекторот Горан Андреевски на овој натпревар не можеше да смета на услугите на капитенот Никола Јаничиќ, Стојановски одигра нешто повеќе од две минути, а со националниот тим не е нашиот стартер на центарската позиција Марко Луканоски, кој е префрлен во селекцијата „Под 20“ години, со која од утре вечер го почнува ЕП од Дивизијата „А“ во Полска.
Во отсуство на овие тројца кошаркари, Стојковиќ и Ќириловски реализираа по 18.поени, а двоен број на поени, 11, имаше уште Петровиќ.
Утре, од 14.часот, по локално време, двете јуниорски селекции на Романија и на Македонија ќе одиграат уште еден контролен натпревар, по што нашите млади кошаркари се враќаат во Скопје, каде ќе ги продолжат подготовките.
