12.08.2020

На разговорите во Истанбул беа поставени некои нови насоки во реализација на нови проекти во оној репрезентативен младински сегмент

Претседателот Перо Антиќ и спортскиот директор Тодор Гечевски во работна посета на Кошаркарската Федерација на Турција

Претседателот на Кошаркарската федерација на С. Македонија, Перо Антиќ, заедно со спортскиот директор на сениорските национални тимови, Тодор Гечевски, денеска беа во официјална и работна посета на Турската кошаркарска Федерација.

На средбата на седиштето на турскиот национален сојуз во Истанбул со генералниот координатор на Турската кошаркарска Федерација, Омер Онан, претседателот Антиќ и спортскиот директор Гечевски остварија конструктивен дијалог во насока за унапредување на досегашната успешна соработка помеѓу двете федерации.

Освен тоа, тема на разговор исто така беа и предложени нови идеи за креирање на нови проекти во оној репрезентативен сегмент, особено поврзани со едуцирањето и развојот на младинските национални селекции.

„Ова е само продолжение на соработката која ја имаме со турската федерација поставена на највисоко ниво. Разговаравме за унапредување на веќе постоечките заеднички проекти кои ги имаме со нашите пријатели од Турција, како и реализација на некои нови идеи поврзани за уште поголема зближеност помеѓу двете федерации“- потенцираше претседателот Антиќ по посетата на турската „Куќа на кошарката“во Истанбул.