Прва лига-мажи: Еуро Никел 2005 добро се препоти во Аеродром - КФСМ
01.11.2020

Дури во финишот, кавадарчани го скршија отпорот на младиот тим на МЗТ Скопје Уни Банка (79:75)

Прва лига-мажи: Еуро Никел 2005 добро се препоти во Аеродром

Дури во самиот финиш на дуелот во СЦ „Јане Сандански“ во Скопје, кавадарчани го скршија отпорот на младиот тим на МЗТ Скопје Уни Банка.

МЗТ Скопје Уни Банка – Еуро Никел 2005  75:79

По нецели пет минути, домашната екипа направи двоцифрена предност (14:4), што го натера Горан Самарџиев, тренерот на Еуро Никел 2005 брзо да го потроши првиот тајм-аут. Во оној втор дел од првата четвртина, кавадарчани резултатски се вратија во натпреварот. Намалија на (16:19), а првиот период МЗТ Скопје Уни Банка го реши во своја корист со (23:19).

Период од играта во кој Тодоровски и Андоноски искомбинираа 15.поени за домаќинот, а Мијатовиќ и Петровски 16. поени кај гостите.

По две минути игра во втората четвртина, со мини серија од пет поени, Еуро Никел 2005 стигна до минимално водство (24:23). За кратко, затоа што „бело-сините“ од Аеродром одново направија предност од шест поени (34:28), како што стоеше на семафорот по 14.минути од играта во кој Американецот Тремејн Исабел на својот деби настап, веќе нанижа десет поени.

За две минути, Караколев (со четири поени) и Мијатовиќ донесоа ново израмнување во СЦ „Јане Сандански“, (34:34). А Соколов ја продолжи серијата на кавадарчани на (9-0), за ново нивно водство (37:34). Го зголемија по техничката грешка на Даскаловски, на (41:37), за првото полувреме да финишира со уште повисоки (46:39) за Еуро Никел 2005.

Тој резултат не го обезхрабри домашниот тим, напротив. По големиот одмор, екипата на Борче Даскаловски влезе со уште поголема самодоверба. Тоа се рефлектираше и во резултатот. За десет минути, домашните кошаркари успеаја негативата од седум поени да ја претворат во водство од пет поени, (65:60).

Но по којзнае кој пат по ред, на оваа средба, тимот од Кавадарци се врати „назад“, во резултатски егал (67:67). И нешто налик на првото полувреме во самиот финиш, уште еднаш кошаркарите на Еуро Никел 2005 направија резултатски пресврт. Во последните три минути влегоа со позитива од пет поени (74:69). И избраниот тим на Самарџиев успеа да ја сочува, и да стигне до првиот триумф во новиот шампионат.

Имаа среќа, затоа што на 11. секунди пред крајот, Савичевиќ не го погоди шутот за потенцијално израмнување, па резултатот остана истиот (75:78). Некоја секунда подоцна, Соколов, од линијата за слободни фрлања, само ја потврди победата на кавадарчани.