Озвој викенд ќе бидат тргнати сите непознати околу изгледот на табелата во нашата елитна кошаркарска конкуренција.
По одигрувањето на 22, и последно коло, ќе ги дознаеме и натпреварувачките броеви, односно ќе биде формиран натпреварувачкиот „костур“ за третиот и последен дел од сезоната – плеј-офот.
Најголемата енигма е околу тоа која екипа ќе биде на позицијата број 1, најдобрата во доигрувањето за титулата. А ќе се решава помеѓу вечните ривали во македонската кошарка, МЗТ Скопје Аеродром и Работнички.
Моменталната состојба на табелата дека двете екипи влегуваат со подеднакви шанси за освојување на пол-позицијата. Имаат идентичен број на бодови, односно број на победи – 17, и порази – 4.
Моментално, Работнички има подобар кош-количник (плус 332) во однос на својот најголем конкурент, не само во оваа сезона, туку и низ историјата (+244). Но актуелниот шампион има предност во меѓусебните дуели одиграни во овој прв круг од натпреварувањето.
На првиот меч, одигран на 21.октомври, МЗТ Скопје како гостин го совлада Работнички со (73:59). На онј вториот, уште една победа на гостите, Работнички славеше во СЦ „Јане Сандански“, со (95:91).
Оттука, на „сино-белите“ им треба победа на гостувањето во сабота навечер (од 18.30 часот) во салата „Независна Македонија“, против Навико Акадмеија ФМП, за да бидат првопласирани.
Работнички мора да чека кикс на својот опонент, и секако, да слави во дуелот против екипата на Гостивар, во натпреварот кој ќе се игра во СРЦ „Кале“, исто така во сабота, од 18.часот, за да остане на првото место.
Отворено е и прашањето за и околу тоа кои екипи ќе се наредат од третата до шестата позиција.
Пред ова коло, најголеми шанси да биде третопласирана е екипата на Пелистер.
Битолчани се на ефект (15-6), и со евентуален триумф на гостински терен во Гевгелија, против Кожув (сабота, 19.часот), ќе останат чекор понапред во однос на пратителите, односно екипите на Чаир 2030 и на ТФТ Моцарт (двете имаат идентичен ефект, 14-7).
Извесно, постои варијанта во која и со пораз, „пелистерци“ би останале на истата позиција, но за тоа ќе им бидат „потребни“ и неуспеси на Чаир 2030 и на ТФТ Моцарт.
Двата скопски ривали во оваа финална рунда се домаќини.
Во сабота навечер (20.30 часот), во СРЦ „Кале“, екипата од Тафталиџе го дочекува Феникс 2010, додека половина час подоцна, од 21.часот, чаирчани, во слатаа „Шабан Трстена“ ќе го пречекаат Охрид.
Во случај и двете екипи да завршат со идентичен учинок, предност ќе има екипата на Чаир 2030.
Во првиот меч, ТФТ Моцарт го порази Чаир 2030 со (77:66), но во оној вториот чаирчани беа доста поубедливи, и победија со повисока разлика (81:63), која им носи повисока стартна позиција во однос на ТФТ Моцарт.
Единствениот натпревар кој во оваа рунда ќе се игра во неделниот термин, е оној во кој ќе се сретнат екипите на Вардар и на Еуро Никел 2005.
Закажан е за 19.часот, „Под Кале“.
По добрата игра против првакот пред некоја вечер, „вардарци“ ќе побараат уште една шанса да стигнат до 4. победа во сезоната со која би имале поголеми шанси во трката за опстанок која ќе ја водат во оној т.н. „Плеј-аут“ сегмент, заедно со Навико Академија ФМП, Охрид и Кожув.
Од друга страна, кавадарчани (скор 13-8) се со загарантирана шеста позиција. Би можеле да се искачат и на некоја повисока, но само во случај на пораз на Чаир 2030 (против Охрид), екипа со која имаат подобар меѓусебен однос на двата претходно одиграни натпревари.
Инаку, без оглед на исходот во саботните натпревари, екипата на феникс 2010 во плеј-офот ќе тргне од позицијата 7, додека пак Гостивар ја има последната, осма позиција.
ПРВА ЛИГА-МАЖИ
ДВОЈКИ 22.КОЛО
30.МАРТ (САБОТА)
18.00: Работнички – Гостивар
Сала СРЦ „Кале“ – Скопје
ЛИНК: https://www.youtube.com/live/hvr5B6RA_E0?si=OZbmCvoKcG6rf5jl
18.30: Навико Академија ФМП – МЗТ Скопје Аеродром
Сала „Независна Македонија“ – Скопје
ЛИНК: https://www.youtube.com/live/yBHq3HAC1Yg?si=SYDVgCFlG0L8B80g
19.00: Кожув – Пелистер
Сала „26.април“ – Гевгелија
ЛИНК: https://www.youtube.com/live/6RA9HdZgOm8?si=LLUiamhiBP7GjVm3
20.30: ТФТ Моцарт – Феникс 2010 (МРТ3)
Сала СРЦ „Кале“ – Скопје
ЛИНК: https://www.youtube.com/live/FZOq5xGhWoY?si=EVytT35OuNxB1twY
21.00: Чаир 2030 – Охрид
Сала „Шабан Трстена“ – Скопје
ЛИНК: https://www.youtube.com/live/fd0xL3IzuU4?si=hT1ZBSKHuPskFpSm
31.МАРТ (НЕДЕЛА)
19.00: Вардар – Еуро Никел 2005
Сала на КК „Вардар“ - Скопје
ЛИНК: https://www.youtube.com/live/nVrgqx9-9v0?si=6rUoSQIsjj9n93jo
ТАБЕЛА: Работнички 38, МЗТ Скопје Аеродром 38, Пелистер 36, Чаир 2030 35, Еуро Никел 2005 34, ТФТ Mоцарт 33, Феникс 2010 32, Гостивар 29, Кожув 26, Охрид 25, Навико Академија ФМП 25, Вардар 24;
