Поради претстојните обврски на екипата која ја брани шампионската титула во АБА 2 лигата, својот меч од 7. првенствено коло екипите на МЗТ Скопје Аеродром и Феникс 2010 ќе го одиграат вечерва.
Во 17.30 часот во големата сала на СЦ „Јане Сандански“, во соседскиот дуел Феникс 2010 (3-3) ќе се обиде да го изненади големиот фаворит. И тоа во доста изменет состав со некоку нови, пред се странски кошаркари.
Зад „металците“ е серија на победи кои ги оставија на делба на првото место на табелата, додека пак во краток временски период „Фениксовци“ ќе мора да играат против уште еден фаворит, МЗТ Скопје Аеродром (5-1), веројатно и најголемиот за шампионската титула. Пред некоја вечер, загубија во дуелот со вицепрвакот, Пелистер, вечерва пак, за избраниците на тренерот Денис Дервишевиќ е уште потешка задача – да пробаат да го изненадат шампионот.
Останатите пет натпревари, интересно, ќе се играат во саботниот термин, би се рекло, оној најредовниот. И тоа на пет различни „локации“, во близок временски интервал(и).
Од 18.часот, Гостивар (скор 2-4), е домаќин на, извесно, најпријатното изненадување во оваа фаза од првенството, екипата на Чаир 2030 (5-1), а во исто време, но во Гевгелија, Кожув (1-5), ќе ја бара втората победа против Вардар (скор 3-3).
По големата победа над Работнички во Скопје во минатото коло, кошаркарите на Еуро Никел 2005 (4-2) ќе бараат „потврда“ за тие два бода на свој терен против новакот во оваа конкуренција, Охрид.
Половина час подоцна следува и веројатно највозбудливата пресметка во овој седми круг од првенството. Онаа „абалигашката“ во која во Битола, Пелистер (4-2) го пречекува составот на ТФТ Моцарт (5-1).
Последниот меч е закажан за 19.часот, во салата „Независна Македонија“ во Скопје, во кој Навико Академија ФМП (0-6) има нова шанса за прва прволигашка победа во оваа сезона во дуелот во кој за противник ја има екипата на Работнички (3-3).
ПРВА ЛИГА-МАЖИ
ДВОЈКИ 7.КОЛО
8. НОЕМВРИ (СРЕДА)
17.30: МЗТ Скопје Аеродром – Феникс 2010 (МРТ3)
Голема сала СЦ „Јане Сандански“ – Скопје
ЛИНК: https://www.youtube.com/live/Ma7vj2_w9YE?si=iCldiRJH3llPm7hE
11.НОЕМВРИ (САБОТА)
18.00: Гостивар – Чаир 2030
Сала „Младост“ – Гостивар
ЛИНК: https://www.youtube.com/live/PUAMKxcVe4M?si=9YmMJlZuSq_B8USW
18.00: Кожув – Вардар
Сала „26.април“ – Гевгелија
ЛИНК: https://www.youtube.com/live/W3Fs02O1xm8?si=yKZAsxeTUGLjokiZ
18.00: Еуро Никел 2005 – Охрид
Сала „Јасмин“ – Кавадарци
ЛИНК: https://www.youtube.com/live/jC6IiHyO81E?si=m1a4OjmDepQTm5J7
18.30: Пелистер – ТФТ Моцарт (МРТ 3)
Сала „Боро Чурлевски“ – Битола
ЛИНК: https://www.youtube.com/live/XpXuw_vXAY0?si=rQhZPGebB5Q7CUod
19.00: Навико Академија ФМП – Работнички
Сала „Независна Македонија“ – Скопје
ЛИНК: https://www.youtube.com/live/a9jQyTYVEKo?si=u0kfFH8G7yW6CVh5
