Се беше на страната на битолчани во дуелот со Кожув, барем таму некаде до 37-38 минута од играта, од последната четвртина во која гевгеличани стигнаа до пресврт, поведоа, но не издржаа во последните две минути, па победата остана за битолскиот состав.
ПЕЛИСТЕР – КОЖУВ 92:87
Постепено ја градеа својата предност кошаркарите на Пелистер во овој меч. Без вистинско форсирање, како одминуваа минутите, таа битолчани се стекаа со се повисока позитива. Ако на крајот на првиот период изнесуваше три поени (20:17), таа беше удвоена до одморот (43:37).
Одлично беше распределен оној поентерски дел кај Пелистер, за разлика од Кожув, каде воглавно поентираа тројца кошаркари, Пилепиќ, Стевановиќ и Вилсон, кои искомбинираа 31 од тие 37 поени до големиот одмор на средбата во салата „Боро Чурлевски“.
Во продолжението, Пелистер се стекна и со двоцифрена предност. Имаа плус 10, во средината на третата четвртина (60:50).Само за момент нивната серија ја прекина Стевановиќ, затоа што многу брзо, битолчани имаа и уште поголеми (68:55), откако Ташовски погоди за три поени (29.минута).
Но на неполни три минути пред крајот на мечот, водеше Кожув. По серијата од (20-7), и новата тројка на Стевановиќ, гостите имаа плус 2 (79:77).
Но домаќините најдоа одговор, во вистинско време, вратија со контра серија од осум поени, за да се вратат во позитива (85:79), но и да му остават на противникот само 1:21 минута за „одговор“. „Црвено-белите“ не го пронајдоа, немаа доволно енергија за уште еден сериозен обид.
Сите пет стартери на Пелистер имаа двоцифрен број на реализации. Антоан заврши со 21, Стајиќ имаше 17, Мишковиќ и Едвардс по 13, а Стојановски уште 12.поени, но тоа не беше се, затоа што во таа група со 11 поени „влезе“ и резервистот Ташовски.
Во онаа од Гевгелија, Стевановиќ запре на 30.поени, Пилепи го слееше со 18, а Вилсон имаше уште 16. Но за нешто повеќе им требаше и поддршка од клупата, добија пет поени од Караџовски, и четири од Главачев.
ПРВА „МТЕЛ“ ЛИГА-МАЖИ
РЕЗУЛТАТИ И ДВОЈКИ 5. КОЛО
Пелистер – Кожув 92:87
МКК Куманово – Гостивар 71:62
Вардар – Работнички 71:79
ТФТ – Шкупи 82:73
Чаир 2030 – МЗТ Скопје Аеродром 95:94
3. НОЕМВРИ (НЕДЕЛА)
18.00: Тиквеш Голден Игл – Феникс 2010
Сала „Јасмин“ – Кавадарци
ЛИНК: https://www.youtube.com/live/sKV8ezRQl3U?si=akuTn2JOe-q8vRD5
ТАБЕЛА: ТФТ 10, Чаир 2030 9, Работнички 9, Пелистер 9, МЗТ Скопје Аеродром 8, Кожув 7, МКК Куманово 7, Гостивар 7, Шкупи 6, Тиквеш Голден Игл 5 (-1), Феникс 2010 5 (-1), Вардар 5;
