ТФТ продолжува со добрите игри, и што е уште поважно, победувањето. Останаа непоразени и по четвртиот одигран натпревар, уште еднаш на гостински терен одиграа сигурно и ја потврдија добрата форма од почетокот на сезоната.
ФЕНИКС 2010 – ТФТ 63:80
Доминантна игра прикажаа гостите во првото полувреме. Од самиот почеток наметнаа свој, препознатлив стил на игра, со доста шутирање, но и висок процент на реализација. Тоа резултираше со стандардно водство, кое на истекот на првиот период изнесуваше седум поени, (20:13).
Слично беше и во продолжението на играта. Во вториот период ТФТ таа предност само ја удвои, на полувремето „црно-белите“ веќе имаа плус 14 (49:35).
Нешто подобар беше почетокот за домашната екипа по големата пауза. Со серија од (13-5) Феникс 2010 поништи голем дел од негативата. Се доближија на достижни (48:54), сето тоа во рок од само четири минути.
Сепак, тој сериозен напад на домаќините, со тројка, го „одби“ Гринли , за нешто посигурни (57:48), а Николов донесе уште повисоки (60:48) на средина од третата четвртина.
Но, домашните кошркари не успеаја да направат нешто повеќе од тоа, иако имаа доста време. ТФТ се покажа како доста стабилен тим, кој знае што сака на овој натпревар, и не дозволи ново приближување.
И сосема заслужено ја запиша и четвртата победа во исто толку натпревари. Со огромен придонес на стартната петорка. Сите пет играчи стигнаа до десет или повеќе поени. Николов оствари и дабл-даб учинок од 16.поени и 12. скока, Говенс даде 14, Мекиќ имаше 12, Зафиров 11, а Гринли уште 10.поени.
Кај Феникс 2010, Митревски даде 17.поени, исто толку запиша и Марфи, кој додаде и 13.скока, додека Баун заврши со 12.поени (и четири асистенции).
ПРВА „МТЕЛ“ ЛИГА-МАЖИ
РЕЗУЛТAТИ 4. КОЛО
Феникс 2010 – ТФТ 63:80
Работнички – Чаир 2030 86:63
МЗТ Скопје Аеродром – МКК Куманово 78:71
Шкупи - Вардар 89:68
Гостивар – Пелистер 77:66
Кожув - Тиквеш Голден Игл 85:64
ТАБЕЛА: ТФТ 8, МЗТ Скопје Аеродром 7, Чаир 2030 7, Работнички 7, Пелистер 7, Кожув 6, Гостивар 6, МКК Куманово 5, Тиквеш Голден Игл 5, Феникс 2010 5, Шкупи 5, Вардар 4;
ИДНО КОЛО (02.11)
Тиквеш Голден Игл – Феникс 2010
Вардар – Работнички
ТФТ – Шкупи
Пелистер – Кожув
МКК Куманово – Гостивар
Чаир 2030 – МЗТ Скопје Аеродром
