Селекторот Драган Бајиќ со 15 кошаркари за ноемврискиот квалификациски ФИБА „прозорец“

21.11.2021

Денеска, заедничка вечера во хотелот „Double tree by Hilton“ во Скопје, а од понеделник, од 10 часот, е првиот тренинг во СЦ „Јане Сандански“

Селекторот на нашата машка сениорска репрезентација, Драган Бајиќ, го скрати списокот на кошаркари на кои ќе смета за ноемврискиот ФИБА „прозорец“ од квалификациите за Светскиот Куп во 2023 година.

Со оглед на времето до првите квалификациски обврски, односно првиот натпревар од квалификациите за СК, закажан за 26.ноември во Скопје, кога го пречекуваме репрезентацијата на Шпанија, селекторот Бајиќ се определи за список од 15. кошаркари.

Првиот собир на нашиот сениорски национален тима е предвиден да биде вечерва, во хотелот „Double tree by Hilton“ во Скопје, каде ќе биде и „базата“ на нашата најдобра машка селекција во овој квалификациски циклус.

Од 19.30 часот, предвидена е заедничка вечера, а веќе од понеделник стартуваат мини-подготовките пред почетокот на Светските квалификации

Во првиот ФИБА „прозорец“ за пласман на Светскиот Куп 2023, на 26. ноември, во Скопје, играме против актуелниот светски шампион, репрезентацијата на Шпанија.

Натпреварот ќе се игра во Спортскиот центар „Јане Сандански“ во Скопје, со почеток од 19.30 часот (директен пренос на Спорт Клуб).

По средбата со Шпанија, на 29. ноември следува и онаа против репрезентацијата на Украина, која ќе се игра во „Палатата на спортовите“ во Киев.

Согласно со планот на подготовките, нашите најдобри кошаркари ќе работат во два дневни термини. Утринските тренинзи се предвидени од 10, а вечерните од 18.часот, во салата на СЦ „Јане Сандански“.

Согласно планираното на стручниот штаб, предводен од селекторот Драган Бајиќ, ќе се тренира и на денот на одигрување на натпреварот со „црвената фурија“, на 26. ноември.