Овие тројца кошаркари поентерски го одбележаа „враќањето“ на кавадаречкиот прволигаш на старите патеки, односно горните позиции на табелата во Првата лига...
Некогаш Фени Индусттри, сега Еуро Никел 2005. Сеедно, тоа е клубот кој во оваа полусезона и дефинитивно го најави, па и реализира враќањето на позициите на кои беше до пред извесно време.
Оние во горниот дел од табелата во нашата Прва лига.
Доказ за тоа се нели, резултатите. А тие велат дека во 11. одиграни натпревари, тимот кој сега го предводи кавадаречката играчка легенда, Горан Самарџиев, оствари ефект од осум победи и три порази со кој го дели второто место, заедно со екипата на Гостивар.
Резултат кој веројатно е над очекувањата на тимот од „Јасмин“, кој можеше да биде дури и подобар да не беа оние несреќни порази, особено оној во Куманово.
А до него стигнаа во најголема мерка по одличните, пред се, поентерски игри на тројца кошаркари: Алекс Марзет, Ѓорѓе Каплановиќ и Јане Петровски.
Оваа тројка реализирала 46.6 од вкупно 85.2 поени на екипата на Еуро Никел 2005.
Американецот има најголем удел – 18.7 поени, до него е Каплановиќ со 14.5, додека пак искусниот плејмејкер трет во овој поредок со просек од 13.4 поени.
Блиску до двоцифрен ефект се уште Дарко Соколов (9.1) и Никола Караколев со 8.9 постигнати поени по меч.
Би се рекло и очекувано, Каплановиќ е и најдобриот скокач во тимот од Кавадарци. Високиот Србин има просек од 7.4 скока по натпревар, а доста добро во таа категорија котира и Филип Бакоч со реализирани седум скока по меч.
Јане Петровски е лидер на асистентите. Во просек има по 4.3 успешни додавања кон соиграчите. Марзет има 2.8, а Соколов нешто помалку, 2.7 асистенции по средба.
Петровски и Марзет губат по најмногу топки, 2.4 по натпревар, а Соколов и Предраг Николиќ „крадат“ најмногу топки, по 1.5 по меч.
Процентуално гледано, Филип Бакоч е најдобриот од линијата за слободни фрлања, затоа што погодува со 93.3% на успешност.
Кога станува збор за шутот вреден два поени, во Еуро Никел 2005 тоа најдобро го прави Каплановиќ, кој има 75% од таа позиција, далеку понапред во однос на Петровски (65.5%) и Караколев (64/6%).
Петровски е и најдобриот шутер за три поени. Реализирал најмногу тројки – 29, и со најдобра реализација – 53.7%, доста подобра во однос на Марзет кој на пример погодува со 41.5% на успешност од таа позиција.
Во овие 11. мечеви, Самарџиев им дал шанса на вкупно 14. кошаркари. А Еуро Никел 2005 дава по 85.2 поени на еден натпревар. Има и по 35.5 скока, 18.2 асистенции, 13. загубени и 8.1 освоени топки. Реализираат со 71.6% од линијата за слободни фрлања, 58% во обидите вредни два, и 34.3% во оние кои вредат три поени.
