Старт на подготовките на нашата женска сениорска репрезентација - КФСМ
25.01.2021

Седум дена од подготовките ќе бидат реализирани во старата „база“ – Охрид

Старт на подготовките на нашата женска сениорска репрезентација

Она што функционираше добро во ноемврискиот „прозорец“, стручниот штаб на нашата женска сениорска селекција предводен од селекторот Владимир Ѓоровиќ, сака да го повтори и во наредниот период. Оној во кој нашата најдобра женска селекција ќе се подготвува за настап на последниот турнир од квалификациите за Евробаскетот, кој оваа година ќе се одржи во Шпанија и во Франција.

Од денеска, па во наредните седум дена, избраничките на селекторот Ѓоровиќ се во Охрид каде ќе биде реализиран првиот дел од подготовките.

По вчерашното задолжително PCR тестирање од корона вирус, реализирано во Клиниката „Жан Митрев“ во Скопје, денеска, кандидатите за место во националниот тим се упатија во Охрид, каде вечерва од 17.30 часот, во салата „Билјанини извори“  ќе биде одработен првиот тренинг

Во малку изменет состав од оној кој ги одигра двете последни средби во „балонот“ во Рига. Во овој февруарски „прозорец“ на ФИБА, националниот тим ќе биде составен од познати кошаркарки кои веќе биле дел од репрезентацијата.  

На овој скратен список, нови имиња: Матеа Атанасовска, Елена Тасевска, како и Софија Лазареска. Три кошаркарки кои се дел од лигите во Италија. Ги нема Марија Димитријевиќ и Сандра Лазареска, а нова шанса ќе чека Катерина Поп Димитровска, која поради позитивен тест отпадна непосредно пред ноемвриските подготовки во Охрид, а сега е повторно на списокот на кандидатки за настап во „балонот“ во Рига, предвиден за периодот од 4. до 6.февруари.

Или последен квалификациски турнир на кој ќе играме против селекциите на Летонија (4.февруари) и Хрватска, на 6.февруари.