Стојан Ѓуроски не се договори со Евре, ја менува играчката средина - КФСМ
08.06.2020

Прекинот на сезоната во ПРО Б лигата е една од причините поради која нашиот репрезентативец заминува од Франција.

Стојан Ѓуроски не се договори со Евре, ја менува играчката средина

Актуелниот македонски репрезентативец не ги договори условите за продолжение на соработката со францускиот ПРО Б лигаш Евре. Па по една, нецела, сезона помината во Евре во онаа наредната ќе игра во друга средина.

„Не останувам во Евре“- потврдува 203 сантиметри високото крило на нашиот национален тим. „Вистина е дека преговаравме во изминатиот период, но не постигнавме согласност да го продолжам договорот за наредната сезона“- дополнува Ѓуроски.

Оваа сезона како играч на Евре, Стојан Ѓуроски ќе памети по тоа дека одигра на вкупно 20.натпревари. И дека за просечни 26.3 минути по натпревар, дојде до просек изразен преку 8.4 поени, 3.3 скока и 3.асистенции по натпревар. Реализираше со 33.7% во шутот за три и 45.5% во оној за два поени. Имаше и 82.4% реализација од линијата за слободни фрлања.

Претходно, 28. годишниот кошаркар играше во Шпанија, за второлигашите Милила и Хуеска. И нема да биде никакво изненадување доколку и во наредната ќе биде на Пиринејскиот Полуостров.

„Од Шпанија носам убави искуства. Зошто да не, но сè ќе зависи од понудите во текот на летото“- порачува Ѓуроски.