Три кадетски екипи од Македонија ќе бидат дел од WABA лигата - КФСМ
04.08.2020

Екипите на Вардар, Бадел 1862 и Крива Паланка ќе ја претставуваат нашата држава во женската кадетска конкуренција на Јадранот

Три кадетски екипи од Македонија ќе бидат дел од WABA лигата

Македонија ќе има свои претставници и во женскиот сегмент на АБА лигата, макар тоa било и во кадетска конкуренција, затоа што три наши клуба испратија пријави за учество во следното издание на кадетската WABA лига.

Кадетските екипи на Вардар и Бадел 1862 од Скопје и Крива Паланка се дел од лигата во која ќе партиципираат вкупно 20. клубови од просторите на поранешната држава.

Поделени во четири групи, а онаа „Д“ група е „македонската“. Покрај нашите три претставници ќе разигруваат и две екипи од Црна Гора (Будуќност Бамекс и Приморје).

Планирано е одигрување на три круга-турнири. Стартот е (ако здравствените и безбедносните услови го овозможат тоа) на 25. октомври, следниот е планиран за 29. ноември, а завршниот на 20. декември.

Во улога на домаќин на првиот собир во Скопје ќе бидат екипите на Вардар и на Бадел 1862, а на вториот е екипата на Крива Паланка. Последниот ќе се одржи во Подгорица, по што следува втората фаза од шампионатот.

Согласно со пласманот во првиот круг, ќе се формираат нови натпреварувачки групи во кои ќе бидат пренесени бодовите од првата фаза.

Најдобрите четири екипи во оваа возрасна категорија (кошаркарки родени 2004 година и помлади), на 24. и 25. април, 2021 година, ќе бидат учесници на завршниот турнир-„Фајнал-фор“.