Првото продолжение во новата сезона од Првата лига го одиграа кошаркарите на Гостивар и Работнички.
Откако во регуларниот дел гостиварци надполнија дефицит од 20.поени, на крајот не успеаја да направат комплетен резултатски пресврт
Гостивар – Работнички 82:92 (79:79 во регуларен дел)
Николовски даде девет, а Враговиќ осум поени во водството кое Работнички го имаше по првите 10.минути (25:15) во дуелот во салата „Младост“.
По нецели две минути од втората четвртина гостите од „Градски парк“ веќе имаа двојно повеќе дадени, во однос на примени поени (30:15).
Не им одеше ама баш ништо на домашните кошаркари кои некоја минута подоцна влегоа во „минус“ и од 20.поени (25:45). Разлика која во голема мерка дојде и поради одличниот шут, од дури 60% за три поени (6/10), кои црвено-белите“ го имаа во 15.минути од дуелот во Гостивар.
Моменти во кои освен Николовски и Враговиќ, на теренот, и тоа со десет поени „се појави“ и Американецот Питс. А тоа значеше и многу помирна, потечна игра на гостинската екипа која на полувремето ја одржа таа висока предност (51:34). По егал-играта во третата, серијата од (7-0) во последната четвртина како да ги размрда гостиварци.
Стигнаа на едноцифрен минус (60:69). Но не се задоволија со тоа кошаркарите кои ги предводи Марјан Србиноски. Серијата на Гостивар достигна и до (17:2), по која веќе Работнички не беше сигурен победник (68:71).
Не им помогна на гостите од Скопје ниту новиот тајм-аут на нивниот тренер Димитар Мираковски. Армстед ги донесе своите и до нерешен резултат (71:71), па победникот се решаваше во последните 180 секунди.
Неверојатно звучеше резултатот во тие седум минути од играта, (20:2) за Гостивар. Црната серија на Работнички, макар и со едно реализирано слободно фрлање, ја прекина Младеновиќ, на 2:48 минути пред крајот.
Гостивар дури и поведе (73:72), пред Белмазовиќ да ја врати предноста на гостинската страна, и тоа со тројка у уште два поени од „пенали“, за (77:73).
Имаше Работнички „добиен меч“ на 18. секунди пред крајот кога Питс реализира два „пенали“ за (79:75). Но по поентирањето на Армстед, Костоски му ја украде топката на Балмазовиќ. А „отпадокот“ на Армстед, Тодоровиќ го претвори во нерешени (79:79).
Во екстра периодот Гостивар едноставно го „снема“. Заличе на екипата од првото полувреме. Дадоа „сино-белите“ само три поени, примија дури 13, па Работнички слави втор важен триумф (92:82) во рок од неколку дена во двата дерби натпревари од стартот на новата сезона.
ПРВА ЛИГА-МАЖИ
РЕЗУЛТАТИ 2. КОЛО
Црн Дрим Грин Мобил – ТФТ 69:79
МЗТ Скопје Аеродром – Кожув 81:75
Гостивар – Работнички 82:92
Куманово 2009 – МЗТ Скопје Уни Банка 77:73
Еуро Никел 2005 – Академија ФМП 96:82
Пелистер – Вардар одложено
ИДНО 3. КОЛО (7.НОЕМВРИ)
Академија ФМП - Куманово 2009
ТФТ - Пелистер
Кожув - Работнички
МЗТ Скопје Уни Банка - Црн Дрим Грин мобил
Гостивар - Еуро Никел 2005
Вардар - МЗТ Скопје Аеродром
