По женската, вечеева во СРЦ „Кале“ победа прослави и машката репрезентација на Македонија „Под 14“ години.
Нашиот машки состав беше подобар од романскиот. Имаа момчињата во „црвено-жолта“ комбинација постојано водство, добра контрола над играта, и посебно на резултатот, што на крајот го валоризираа со успех, односно победа.
РОМАНИЈА (М) – МАКЕДОНИЈА (М) 40:60
Младите македонски кошаркари имаа сосема добар старт на вториот меч на турнирот во Скопје. „отворија“ со предност од (15:10) во првата четвртина, предност која ја одржуваа, но и зголемија избраниците на селекторот Нермин Пепиќ.
На полувремето, македонската селекција „Под 14“ години водеше со (29:22).
Уште подобро нашиот тим го почна третиот дел од играта. На средина од тој период, со серија од (9-2), Македонија поведе со највисоки (38:24). Кермичиев беше одличен во тој дел од играта, реализираше дури пет тројки (од девет обиди), за 15.поени.
Но не се задоволивме со таа позитива, до крајот на оваа делница Македонија се одвои на уште поголеми (45:28). А по поените на Љутков и на Јетиши, нашата млада репрезентација имаше и највисоки (49:28). Како најава за првиот успех на турнирот.
Покрај Кермичиев, кој освен 15.поени имаше и пет скока и две асистенции, Јетиши беше и вториот „двоцифрен“ во нашиот тим, реализираше 12.поени, имаше и шест скока, четири освоени топки и три асистенции. Но важен момент, особено за стручниот штаб, е податокот кој вели дека дури десет наши кошаркари се запишаа во листата на стрелците.
Согласно со распоредот на натпреварите, утре, 30.ноември, двете наши селекции имаат слободен ден. Веќе во сабота македонските ќе се сретнат со двете репрезентации на Бугарија, додека пак на затворањето на собирот во Скопје, во недела, наши противници ќе бидат младите кошаркар(к)и од Косово.
РЕЗУЛТАТИ И РАСПОРЕД НА НАТПРЕВАРИТЕ
1.КОЛО
Романија – Бугарија (ж) 30:58
Романија – Бугарија (м) 37:63
МАКЕДОНИЈА – Турција (ж) 15:49
МАКЕДОНИЈА – Турција (м) 61:83
2.КОЛО
Бугарија – Косово (ж) 59:19
Бугарија – Косово (м) 57:26
Романија – МАКЕДОНИЈА (ж)32:39
Романија – МАКЕДОНИЈА (м) 40:60
29. НОЕМВРИ (ПЕТОК)
15.00: Турција – Бугарија (ж)
17.00: Турција – Бугарија (м)
19.00: Косово – Романија (ж)
21.00: Косово – Романија (м)
