Женската сениорска репрезентација ги одработи подготовките во Охрид. Од денеска нашите најдобри кошаркарки се во главниот град на Летонија, Рига, каде ќе ги играат наредните две средби од квалификациите за пласман на Еворбаскетот 2021 година.
На последниот ден од престојот крај Охридското Езеро, селекторот Владимир Ѓоровиќ го формираше составот со кој ќе се обиде да направи подобар резултат во однос на оние почетните во групата „И“ од евроквалификациите.
За средбите со Хрватска, а потоа и со Германија, Ѓоровиќ одбра 11. кошаркарки. На оние десет кои ги поминаа седумдневните подготовки во Охрид, непосредно пред заминувањето за Софија, а потоа и за Рига, се приклучи и капитенот на националниот тим, Анџелика Митрашиновиќ.
„За жал, од здравствени причини, не можеме да сметаме на некои кошаркарки како Софија Лазареска, која мораше да остане во Италија, и Драгана Јоловиќ, која беше со нас во Охрид, но исто така ќе го пропушти овој турнир во Рига“ – појаснува Ѓоровиќ за и околу конечниот избор за она што следува во текот на оваа седмица.
На 12. ноември, дуелот со селекцијата на Хрватска, а два дена подоцна, на 14. ноември, и оној против репрезентацијата на Германија.
„И овојпат не можеме да сметаме на комплетен ростер. Но радува тоа што во овие неколку дена пред првиот натпревар ќе имаме можност да се воиграме со Бонер и со Митрашиновиќ, за која овие тренинзи во Рига ќе бидат први во овие квалификации со останатиот дел од тимот“- дополнува селекторот.
Согласно со официјалниот распоред кој го доби водството на нашиот национален тим, во Рига се предвидени по два тренинзи дневно.
Нашата селекција ќе тренира во два термини, утринскиот од 10.00 до 10.50 часот, а попладневниот од 16.40 до 18.10 часот.
Предвиден е и опциски термин (од 9.30 до 10.20 часот) на денот на првиот натпревар, на 12. ноември, кога од 15.30 часот, играме против селекцијата на Хрватска.
СПИСОК НА КОШАРКАРКИ ЗА ТУРНИРОТ ВО РИГА
1. Нена Трајчевска
2. Aнџелика Митрашиновиќ (Будуќност Бемакс - Црна Гора)
3. Матеа Николиќ (Кампо Басо - Италија)
4. Ивана Кметовска (КАМ Баскет)
5. Ивона Пејковска (Вардар)
6. Сања Адамовска (Бадел 1862)
7. Јована Петрушевска (Вардар)
8. Габриела Модева (Струга 2009)
9. Марија Димитријевиќ (Бадел 1862)
10. Цветанка Димова (Бадел 1862)
11. Девана Бонер (Конектикат Сан – САД)
