Со последните натпревари од групната фаза, конечно е дефиниран и изгледот на сите групи и познати се сите репрезентации што ќе учествуваат во онаа втора, елиминациска фаза од Европското првенство.
Завршниот дел од 41. по ред Евробаскет ќе се игра во Берлин, а таму патуваат 16 репрезентации за кои, генерално, се очекуваше да бидат дел од разигрувањето за титулата.
А само две селекции, оние на Србија и на Грција, може да се пофалат со максимален ефект во овој прв дел од шампионатот кој се играше во Прага, Келн, Тбилиси и Милано.
Селекциите кои и претходно важеа како фаворити, ги победија сите пет натпревари, и ги освоија првите места во групите „Ц“, односно „Д“.
Но, тоа не мора да значи и нешто подобар распоред во осминафиналето, па и битките кои следуваат до трофејот кој го брани селекцијата на Словенија и која се чини дека има најлесен пат од фаворитите.
Во осминафиналето, Лука Дончиќ и соиграчите ќе играат со Белгија, а ако победат, ќе се сретнат со подобриот од пресметката меѓу Украина и Полска. Ако нема изненадување, полуфиналето ќе биде вистински спектакл во „Мерцедес бенз Арената“, проектирано полуфинале би било Србија-Словенија, реприза на последното финале од 2017 во Истанбул.
Грција е голем фаворит за место во полуфиналето. Според „костурот“, во осминафиналето кое стартува веќе утре, за ривал ја имаат Чешка, која го „фати последниот воз“ со победата против Израел, а во четвртфиналето треба да се сретне со Германија. Уште еден одличен меч во најава, во кој извесно е, Германците ќе има што да кажат пред својата публика во Берлин.
ДВОЈКИ - ОСМИНАФИНАЛЕ
10.СЕПТЕМВРИ
12.00: Турција – Франција
14.30: Словенија – Белгија
18.00: Германија – Црна Гора
20.45: Шпанија – Литванија
11.СЕПТЕМВРИ
12.00: Украина – Полска
14.30: Финска – Хрватска
18.00: Србија – Италија
20.45: Грција - Чешка
